Semavic® Next — arıqlama və bədən çəkisinin qorunub saxlanılması üçün nəzərdə tutulmuş, tərkibində təsiredici maddə qismində semaqlutid olan preparatdır. Semaqlutid insanlarda qida qəbulundan sonra bağırsaqlarda ifraz olunan qlükaqonabənzər peptid-1-in (QBP-1) analoqudur. Semavic® Next baş beyində iştahanı tənzimləyən reseptorlara təsir göstərir, özünüzü tox və daha az ac hiss etməyinizə, həmçinin qidaya qarşı daha az meylli olmağınıza səbəb olur. Bu, daha az qida qəbul etməyinizə və bədən çəkinizin azalmasına kömək edəcək. Semavic® Next aşağı kalorili pəhriz və fiziki yüklənməyə əlavə olaraq istifadə üçün göstərişdir.

İstifadəsinə göstərişlər

Semavic® Next preparatı 18 yaş və yuxarı böyüklərdə aşağı kalorili pəhriz və fiziki yüklənməyə əlavə olaraq, bədən çəkisinə nəzarət, o cümlədən bədən çəkisinin azaldılması və qorunub saxlanılması məqsədilə, başlanğıc bədən kütlə indeksi (BKİ) aşağıdakı kimi olan pasiyentlərdə istifadə üçün göstərişdir:

• ≥ 30 kq/m2 (piylənmə)
• ≥ 27 kq/m2, lakin < kq/m2 (artıq bədən çəkisi) – bədən çəkisi ilə əlaqəli ən azı bir yanaşı patologiya, məsələn, disqlikemiya (prediabet və ya tip 2 şəkərli diabet (ŞD2)), arterial hipertenziya, dislipidemiya, obstruktiv yuxu apnoyesi və ya ürək-damar xəstəlikləri olduqda.

Semavic® Next preparatı diaqnostika olunmuş ürək-damar xəstəliyi və piylənməsi və ya artıq bədən çəkisi olan 18 yaşdan yuxarı böyüklərdə böyük ürək-damar hadisələrinin* inkişaf etmə riskinin azaldılması üçün göstərişdir.

^*Böyük ürək-damar hadisələrinə aşağıdakılar daxildir: ürək-damar patologiyası səbəbindən ölüm, ölümlə nəticələnməyən miokard infarktı, ölümlə nəticələnməyən insult.

Yaxşılaşma baş vermirsə və ya özünüzü pis hiss edirsinizsə, həkimə müraciət etməlisiniz.

Əks-göstərişlər

Aşağıdakı hallarda Semavic® Next preparatını istifadə etməyin. Əgər Sizdə:

• semaqlutidə və ya preparatın tərkibinə daxil olan və 6-cı bölmədə sadalanmış köməkçi maddələrdən hər hansı birinə qarşı yüksək həssaslıq varsa;
• anamnezdə, o cümlədən ailə anamnezində qalxanabənzər vəzinin medullyar xərçəngi;
• çoxsaylı endokrin neoplaziya (ÇEN), tip 2;
• tip 1 şəkərli diabet (ŞD1);
• diabetik ketoasidoz;
• ağır dərəcəli qaraciyər çatışmazlığı;
• böyrək çatışmazlığının son mərhələsi (kreatinin klirensi (KK) < mL/dəq);
• IV funksional sinif xroniki ürək çatışmazlığı (XÜÇ) (NYHA (Nyu-York Kardiologiya Assosiasiyası) təsnifatına uyğun olaraq).

Xüsusi göstərişlər və ehtiyat tədbirləri

Semavic® Next preparatını istifadə etməzdən əvvəl müalicə həkiminizlə məsləhətləşin.

Aşağıda göstərilən hallardan hər hansı biri Sizə aiddirsə, mütləq müalicə həkiminizi bu barədə xəbərdar edin:

• Əgər Sizdə mədə-bağırsaq traktı tərəfindən pozuntular varsa
  Semavic® Next preparatı ilə müalicə müddətində Sizdə mədə-bağırsaq traktı (MBT) tərəfindən ürəkbulanma, qusma və ya ishal kimi arzuolunmaz reaksiyalar yarana bilər ki, bunlar susuzlaşmaya (maye itkisinə) səbəb ola və nadir hallarda böyrəklərin funksiyasının pisləşməsinə gətirib çıxara bilər. Susuzlaşmanın qarşısını almaq üçün kifayət qədər maye qəbul etməyiniz vacibdir. Əgər Sizdə böyrək problemləri varsa, kifayət qədər maye qəbulu xüsusilə vacibdir.
• Əgər Sizdə əvvəllər pankreatit (mədəaltı vəzinin iltihabı) olubsa
• Əgər Sizdə güclü və davamlı qarın ağrısı, qıcqırma, ürəkbulanma və ya qusma, ümumi vəziyyətin pisləşməsi yaranarsa, dərhal həkimə müraciət edin, çünki bu, kəskin pankreatitin (mədəaltı vəzinin iltihabının) əlaməti ola bilər.
• Əgər Sizdə xolesistitin (öd kisəsinin iltihabı) əlamətləri yaranarsa – sağ qabırğaaltı nahiyədə çiyinə, kürək sümüyünə və ya körpücük sümüyünə irradiasiya edə bilən ağrı, ürəkbulanma, gəyirmə, skleraların və ya dərinin saralması, dəridə qaşınma.
• Əgər Sizdə tip 2 şəkərli diabet vardırsa
  Semavic® Next preparatı insulini əvəz etmir.
  Semavic® Next preparatını digər QBP-1 reseptor aqonistləri ilə birlikdə istifadə etməyin, çünki bu, arzuolunmaz reaksiyaların güclənməsinə və doza həddinin aşılmasına gətirib çıxara bilər.
• Əgər Siz sulfonil sidik cövhəri törəmələri və ya insulin preparatları qəbul edirsinizsə. Bu preparatların Semavic® Next ilə kombinasiyası qanda şəkərin səviyyəsinin azalması (hipoqlikemiya) riskini artıra bilər. Sizə sulfonil sidik cövhəri törəmələrinin və ya insulinin dozasının azaldılması tələb oluna bilər, müalicə həkimi ilə məsləhətləşin.
• Əgər Sizdə diabetik retinopatiya (diabetik göz xəstəliyi) vardırsa Qanda şəkərin səviyyəsinə nəzarətin sürətlə yaxşılaşması diabetik göz xəstəliyinin müvəqqəti kəskinləşməsinə səbəb ola bilər. Əgər görmə ilə bağlı problemləriniz vardırsa, həkiminizlə məsləhətləşin.

Effektivlik və təhlükəsizlik barədə məlumatların olmaması və ya məhdud istifadə təcrübəsi ilə əlaqədar olaraq, aşağıdakı hallar/xəstəliklər zamanı Semavic® Next preparatının istifadəsi tövsiyə olunmur:

• bədən çəkisinin azaldılması üçün digər preparatların istifadəsi;
• tip 1 şəkərli diabet;
• ağır dərəcəli qaraciyər çatışmazlığı;
• böyrək çatışmazlığının son mərhələsi;
• IV funksional sinif xroniki ürək çatışmazlığı (XÜÇ)(NYHA təsnifatına uyğun olaraq).

Aşağıdakı hallarda Semavic® Next preparatını ehtiyatla istifadə edin. Əgər:

• yaşınız 75-dən yuxarıdırsa;
• Sizdə yüngül və ya orta dərəcəli qaraciyər çatışmazlığı;
• bağırsağın iltihabi xəstəlikləri;
• mədənin diabetik parezi vardırsa.

Aspirasiya və ya aspirasion pnevmoniya riski

Ümumi anesteziya və ya dərin sedasiya altında aparılan cərrahi əməliyyatlar zamanı QBP-1 reseptor aqonistləri qəbul edən pasiyentlərdə mədənin boşalmasının ləngiməsi və qalıq mədə möhtəviyyatının mövcudluğu səbəbindən aspirasiya və ya aspirasion pnevmoniyanın inkişaf etmə riski mümkündür.

Digər preparatlar və Semavic® Next

Əgər Siz hər hansı digər preparatları qəbul edirsinizsə, yaxın zamanda qəbul etmisinizsə və ya qəbul etməyə başlaya bilərsinizsə, bu barədə müalicə həkiminizə məlumat verin.

Əgər Siz qanın laxtalanmasını azaltmaq üçün varfarin tərkibli preparatlar və ya digər oxşar dərman vasitələri (peroral antikoaqulyantlar) qəbul edirsinizsə, bu barədə həkiminizə məlumat verin. Qanın laxtalanma qabiliyyətinin müəyyən edilməsi üçün Sizə tez-tez qan analizi vermək tələb oluna bilər.

Hamiləlik və laktasiya

Semavic® Next preparatını hamiləlik dövründə istifadə etməyin, çünki preparatın gələcək uşağınıza təsir edib-etməyəcəyi məlum deyil.

Semavic® Next preparatının istifadəsi dövründə etibarlı kontrasepsiya vasitələrindən istifadə edin.

Əgər hamilə qalmaq istəyirsinizsə, planlaşdırılan hamiləlikdən ən azı iki ay əvvəl Semavic® Next preparatının qəbulunu dayandırmalısınız.

Əgər Siz hamilə qalmısınızsa və ya hamilə ola biləcəyinizi düşünürsünüzsə, yaxud Semavic® Next preparatının istifadəsi dövründə hamiləliyi planlaşdırırsınızsa, dərhal müalicə həkiminizlə məsləhətləşin, çünki Semavic® Next ilə müalicənizi dayandırmaq tələb olunacaq.

Semavic® Next preparatını laktasiya dövründə istifadə etməyin, çünki preparatın insanlarda ana südünə keçib-keçmədiyi məlum deyil.

Nəqliyyat vasitələrinin idarə edilməsi və mexanizmlərlə işləmək qabiliyyətinə təsiri

Semavic® Next nəqliyyat vasitələrini idarə etmək və mexanizmlərdən istifadə etmək qabiliyyətinizə təsir göstərməyəcək. Lakin bəzi pasiyentlər müalicənin ilk 4 ayı ərzində Semavic® Next preparatının istifadəsi zamanı başgicəllənmə hiss edə bilərlər (“Mümkün arzuolunmaz reaksiyalar” bölməsinə baxın). Əgər Siz başgicəllənmə hiss edirsinizsə, özünüzü yaxşı hiss edənədək nəqliyyat vasitəsini idarə etməməli və mexanizmlərlə işləməməlisiniz. Əgər Sizə əlavə məlumat tələb olunarsa, müalicə həkiminizə müraciət edin.

Əgər Sizdə ŞD2 varsa, Semavic® Next preparatının sulfonil sidik cövhəri törəmələri və ya insulin preparatları ilə kombinasiyada istifadəsi zamanı qanda şəkərin səviyyəsi azala bilər (hipoqlikemiya) ki, bu da diqqətin cəmlənməsi qabiliyyətini zəiflədə bilər. Əgər Sizdə hipoqlikemiyanın hər hansı əlamətləri yaranarsa, nəqliyyat vasitəsini idarə etməyin və mexanizmlərdən istifadə etməyin (qanda şəkərin səviyyəsinin azalması riskinin artması barədə məlumat üçün “Xüsusi göstərişlər və ehtiyat tədbirləri” bölməsinə və qanda şəkərin aşağı səviyyəsinin xəbərdaredici əlamətləri üçün 4-cü bölməyə baxın). Əlavə məlumat üçün müalicə həkiminizə müraciət edin.

İzlənilmə

Preparatın izlənilməsini yaxşılaşdırmaq məqsədilə yeridilmiş preparatın seriya nömrələri və partiyasının yararlılıq müddəti qeyd edilməlidir.

Köməkçi maddələr

Semavic® Next preparatı bir dozada (2,4 mq) 1 mmol-dan (23 mq) az natrium ehtiva edir, yəni mahiyyət etibarilə preparatın tərkibində natrium yoxdur.

Preparatı həmişə müalicə həkiminizin tövsiyələrinə tam uyğun olaraq istifadə edin. Şübhələr yarandıqda, müalicə həkiminizlə məsləhətləşin.

Preparatın dozası və yeridilmə rejimi fərdi xüsusiyyətləriniz nəzərə alınmaqla müalicə həkiminiz tərəfindən seçiləcək.

Tövsiyə edilən doza

Böyüklər

Tövsiyə edilən başlanğıc doza həftədə bir dəfə 0,25 mq təşkil edir. Tövsiyə edilən terapevtik doza həftədə bir dəfə 2,4 mq təşkil edir.

Sizin müalicəniz başlanğıc doza ilə başlayacaq və 16 həftəlik müalicə müddətində aşağıdakı qaydada tədricən artırılacaq:

• Həkiminiz aşağıdakı cədvəldə göstərildiyi kimi, tövsiyə edilən terapevtik dozaya – həftədə 1 dəfə 2,4 mq-a çatana qədər dozanı hər 4 həftədən bir tədricən artırmaq barədə Sizi təlimatlandıracaq.
• Tövsiyə edilən 2,4 mq dozaya çatdıqdan sonra bu dozanı daha artırmayın.

2,4 mq-dan yüksək olan həftəlik dozalar tövsiyə edilmir. Müalicə həkiminiz mütəmadi olaraq müalicənizi qiymətləndirəcək.

Uşaqlarda və yeniyetmələrdə istifadəsi

Uşaqlar üçün preparatın effektivliyi və təhlükəsizliyi müəyyən edilməmişdir.

Yeridilmə yolu və qaydası

Semavic® Next preparatı şpris-qələm vasitəsilə dəri altına yeridilir (dərialtı inyeksiya). Semavic® Next preparatını heç zaman venaya və ya əzələyə yeritməyin.

• İnyeksiya üçün ən uyğun nahiyələr saidlər, qarın və ya budun yuxarı hissəsidir.
• Şpris-qələmi ilk dəfə istifadə etməzdən əvvəl ondan necə istifadə etmək barədə müalicə həkiminizdən soruşun. Əvvəlcədən doldurulmuş çoxdozalı birdəfəlik Semavic® Next şpris-qələminin qablaşmasına daxil edilmiş istifadə təlimatını diqqətlə oxuyun. Şpris-qələmi yalnız onun istifadə təlimatına uyğun olaraq istifadə edin.
• Semavic® Next preparatının Sizə lazım olan dozasını istifadə etdiyinizi hər zaman yoxlayın.

Semavic® Next preparatını həftədə 1 dəfə və mümkünsə, hər həftə eyni gündə yeridin. Lazım gələrsə, sonuncu inyeksiyanızdan ən azı 3 gün keçmişdirsə, bu preparatın həftəlik inyeksiya gününü dəyişə bilərsiniz. Yeni qəbul gününü seçdikdən sonra preparatı həftədə 1 dəfə qəbul etməyə davam edin.

İnyeksiyanı özünüzə günün istənilən vaxtında – qida qəbulundan asılı olmayaraq edə bilərsiniz.

Tip 2 şəkərli diabeti olan pasiyentlər

Əgər Sizdə ŞD2 varsa, bu barədə müalicə həkiminizə məlumat verin. Həkiminiz qanınızda şəkərin səviyyəsinin azalmasının qarşısını almaq üçün ŞD2-nin müalicəsi üçün istifadə olunan preparatların dozasını tənzimləyə bilər.

• Semavic® Next preparatını dəri altına yeritdiyiniz digər dərman vasitələri ilə (məsələn, insulinlərlə) kombinə etməyin.
• Semavic® Next preparatını tərkibində QBP-1 reseptorlarının aqonistləri olan digər dərman vasitələri (məsələn, liraqlutid, dulaqlutid, eksenatid və ya liksisenatid) ilə birlikdə istifadə etməyin.

Müalicənin müddəti

Həkiminiz vəziyyətinizi mütəmadi olaraq qiymətləndirəcək və Semavic® Next preparatını nə qədər müddət istifadə etməli olduğunuzu Sizə bildirəcək.

Əgər Siz Semavic® Next preparatını tələb olunduğundan daha yüksək dozada istifadə etmisinizsə

Dərhal müalicə həkiminizə müraciət edin. Sizdə mədə-bağırsaq traktı (MBT) tərəfindən ürəkbulanma, qusma və ya ishal kimi arzuolunmaz reaksiyalar yarana bilər. Bu, susuzlaşmaya səbəb ola və nadir hallarda böyrək funksiyasının pisləşməsinə gətirib çıxara bilər.

Əgər Siz Semavic® Next preparatını istifadə etməyi unutmusunuzsa

Əgər Siz dozanı yeritməyə unutmusunuzsa və:

• əgər Semavic® Next preparatının inyeksiyasını etməli olduğunuz vaxtdan 5 gün və ya daha az müddət keçmişdirsə – yadınıza düşən kimi buraxılmış dozanı yeridin. Sonra növbəti dozanı təyin olunmuş gündə, adi qaydada yeridin.
• əgər Semavic® Next preparatının inyeksiyasını etməli olduğunuz vaxtdan 5 gündən çox müddət keçmişdirsə – buraxılmış dozanı yeritməyin. Gözləyin və növbəti dozanı planlaşdırılmış gündə adi qaydada yeridin.

Buraxılmış dozanı kompensasiya etmək üçün heç vaxt ikiqat dozanı yeritməyin.

Əgər Siz Semavic® Next preparatını istifadə etməyi dayandırmısınızsa

Müalicə həkiminizlə məsləhətləşmədən Semavic® Next preparatının istifadəsini dayandırmayın. Semavic® Next preparatının istifadəsi ilə bağlı hər hansı əlavə suallarınız yaranarsa, müalicə həkiminizə müraciət edin.

Bütün dərman preparatları kimi, Semavic® Next preparatı da bəzi insanlarda arzuolunmaz reaksiyalara səbəb ola bilər.

Ən ciddi arzuolunmaz reaksiyalar

Nadir hallarda müşahidə olunmuş (1000 nəfərdən ən çoxu 1-də baş verə bilər) ağır allergik reaksiyanın (anafilaktik reaksiyalar, angionevrotik ödem) aşağıdakı əlamətlərindən hər hansı biri yaranarsa, Semavic® Next preparatının istifadəsini dayandırın və dərhal tibbi yardım üçün müraciət edin:

• tənəffüsün və ya udmanın çətinləşməsi;
• başgicəllənmə;
• üzün, dodaqların, dilin və ya boğazın ödemi;
• dəridə güclü qaşınma, səpgilərin və ya suluqların yaranması;
• ürək döyüntülərinin tezləşməsi və həddən artıq tərləmə ilə müşayiət olunan bayılmaöncəsi vəziyyət (arterial təzyiqinin aşağı düşməsi);
• dərinin solğun və soyuq olması, başgicəllənmə və ya zəiflik.

Əgər Sizdə tip 2 şəkərli diabet vardırsa, Semavic® Next preparatı ilə müalicə zamanı görmə problemləri, məsələn, tez-tez müşahidə olunmuş (10 nəfərdən ən çoxu 1-də baş verə bilər) görmə pozuntusu yaranarsa, bu barədə müalicə həkiminizə məlumat verin:

• Gözlərin diabet mənşəli xəstəliyinin ağırlaşmaları (diabetik retinopatiya).

Bəzən müşahidə olunmuş (100 nəfərdən ən çoxu 1-də baş verə bilər) mədəaltı vəzi iltihabının (kəskin pankreatit) əlamətləri yarandıqda, dərhal tibbi yardım üçün müraciət edin:

• kürək nahiyəsinə yayıla bilən güclü və davamlı qarın ağrısı;
• bütün qarın boşluğunda qəfil intensiv ağrılar;
• qıcqırma;
• qusma tutmaları;
• qarında köp və meteorizm;
• ümumi vəziyyətin pisləşməsi: bədən temperaturunun yüksəlməsi, arterial təzyiqin aşağı düşməsi, taxikardiya, tərləmə, dərinin solğunluğu və ya saralması.

Semavic® Next preparatının istifadəsi zamanı müşahidə oluna bilən digər mümkün arzuolunmaz reaksiyalar

Çox tez-tez (10 nəfərdən 1-dən çoxunda rast gəlinir):

• Baş ağrısı;
• Ürəkbulanma;
• Qusma;
• İshal;
• Qəbizlik;
• Qarın ağrısı;
• Zəiflik hissi və ya yorğunluq.

Tez-tez (10 nəfərdən ən çoxu 1-də rast gəlinir):

• Başgicəllənmə;
• Disgevziya;
• Mədə pozuntusu və ya həzmin pozulması;
• Gəyirmə;
• Meteorizm;
• Qarında köp;
• Mədənin iltihabı (“qastrit”) – əlamətlərinə qarın ağrısı, ürəkbulanma və ya qusma aiddir;
• Həmçinin “qastroezofageal reflüks xəstəliyi” də adlandırılan reflüks və ya qıcqırma;
• Öd daşı xəstəliyi;
• Saçların tökülməsi;
• Yeridilmə yerində reaksiyalar;
• Şəkərli diabeti olan pasiyentlərdə qanda şəkərin səviyyəsinin azalması (hipoqlikemiya)*.

^*Qanda şəkərin səviyyəsinin azalmasının əlamətləri qəfil meydana çıxa bilər. Bunlara aşağıdakılar aid ola bilər: soyuq tər, soyuq və solğun dəri, baş ağrısı, ürək döyüntülərinin tezləşməsi, özünü pis hiss etmə (ürəkbulanma) və ya güclü aclıq hissi, görmədə dəyişikliklər, yuxuya meyllilik və ya zəiflik, əsəbilik, narahatlıq və ya çaşqınlıq, diqqətin cəmlənməsi ilə bağlı çətinlik və ya titrəmə. Müalicə həkiminiz qanda şəkərin səviyyəsini necə artırmaq və bu xəbərdaredici əlamətləri müşahidə etdikdə nə etmək lazım olduğunu Sizə izah edəcək. Əgər Siz eyni zamanda sulfonil sidik cövhəri törəmələri və ya insulin qəbul edirsinizsə, hipoqlikemiyanın yaranma ehtimalı daha yüksəkdir. Semavic® Next-in istifadəsinə başlamazdan əvvəl həkiminiz bu preparatların dozasını azalda bilər.

Bəzən (100 nəfərdən ən çoxu 1-də baş verə bilər):

• Ürək döyüntülərinin tezləşməsi;
• Arterial təzyiqin aşağı düşməsi (hipotenziya);
• Üfüqi (oturaq və ya uzanmış) vəziyyətdən şaquli (ayaq üstə) vəziyyətə keçərkən arterial təzyiqin aşağı düşməsi (ortostatik hipotenziya);
• Qan analizində lipazanın və amilazanın səviyyələrinin yüksəlməsi;
• Mədənin boşalmasının ləngiməsi.

Nadir hallarda (1000 nəfərdən ən çoxu 1-də rast gəlinir):

• Bağırsaq keçməzliyi
• Xolangit
• Xolestatik sarılıq

Əgər Sizdə hər hansı yeni simptomlar yaranmışdırsa və ya mövcud simptomlar pisləşmişdirsə, bu barədə müalicə həkiminizə məlumat verin.

Arzuolunmaz reaksiyalar barədə məlumat verilməsi

Əgər Sizdə hər hansı arzuolunmaz reaksiyalar yaranarsa, həkimlə məsləhətləşin. Bu tövsiyə bütün mümkün, o cümlədən içlik vərəqəsində sadalanmayan arzuolunmaz reaksiyalara şamil edilir. Siz həmçinin arzuolunmaz reaksiyalar barədə Avrasiya İqtisadi Birliyinin üzvü olan dövlətlərin bildiriş sistemi vasitəsilə birbaşa məlumat verə bilərsiniz. Siz arzuolunmaz reaksiyalar barədə məlumat verməklə, preparatın təhlükəsizliyi haqqında daha çox məlumat əldə olunmasına kömək etmiş olursunuz.

Rusiya Federasiyası
Səhiyyə sahəsində nəzarət üzrə Federal Xidmət (Roszdravnadzor) Ünvan: 109012, Moskva, Slavyanskaya meydanı, ev 4, tik. 1
Telefon: +7 800 550 99 03
Elektron poçt: pharm@roszdravnadzor.gov.ru
“İnternet” informasiya-telekommunikasiya şəbəkəsində sayt: www.roszdravnadzor.gov.ru

Semavic® Next preparatını uşağın əllərinin çatmadığı yerdə elə saxlayın ki, uşaq preparatı görə bilməsin.

Semavic® Next preparatını şpris-qələmin etiketində və qablaşmada göstərilən yararlılıq müddəti (saxlanma müddəti) bitdikdən sonra istifadə etməyin. Yararlılıq müddətinin başa çatma tarixi göstərilən ayın sonuncu günüdür.

Semavic® Next preparatını 2–8 °C temperaturda soyuducuda saxlayın.

Dondurmayın, dondurucu kameranın yaxınlığında yerləşdirməyin, preparat dondurulmuşdursa, istifadə etməyin.

İlk istifadədən sonra

İçərisində preparatın olduğu istifadə edilən və ya ehtiyat qismində bir yerdən başqa yerə daşınan şpris-qələmi 30 °C-dən yuxarı olmayan temperaturda və ya 2 °С-dən 8 °С-dək temperaturda (soyuducuda) 6 həftədən çox olmamaqla saxlayın.

Dondurmayın. İstifadə etdikdən sonra işıqdan qorumaq üçün şpris-qələmi qapağı ilə bağlayın. Həddən artıq istiliyin təsirindən qoruyun.

Məhlulun şəffaf və rəngsiz olmadığını görürsünüzsə, Semavic® Next preparatını istifadə etməyin.

Preparatı kanalizasiyaya atmayın (tökməyin). Artıq Sizə lazım olmayan preparatın necə utilizə (məhv) edilməli olduğunu əczaçıdan soruşun. Bu tədbirlər ətraf mühitin qorunmasına kömək edir.

Semavic® Next preparatının tərkibində aşağıdakı maddələr vardır:

Preparatın təsiredici maddəsi semaqlutiddir.

Semavic® Next, 0,25 mq/doza, dərialtı yeridilmə üçün məhlul

Məhlulun hər mL-də 0,68 mq semaqlutid vardır. Əvvəlcədən doldurulmuş hər bir şpris-qələmdə 3 mL məhlulda 2,04 mq semaqlutid (hər biri 0,25 mq olmaqla 8 doza) vardır.

Digər inqrediyentlər bunlardır: dinatrium hidrofosfat dihidrat, propilenqlikol, fenol, xlorid turşusunun 10 %-li məhlulu və ya natrium hidroksidin 10 %-li məhlulu (pH-ın korreksiyası üçün), inyeksiya üçün su.

Semavic® Next, 0,5 mq/doza, dərialtı yeridilmə üçün məhlul

Məhlulun hər mL-də 1,34 mq semaqlutid vardır. Əvvəlcədən doldurulmuş hər bir şpris-qələmdə 3 mL məhlulda 4 mq semaqlutid (hər biri 0,5 mq olmaqla 8 doza) vardır.

Digər inqrediyentlər bunlardır: dinatrium hidrofosfat dihidrat, propilenqlikol, fenol, xlorid turşusunun 10 %-li məhlulu və ya natrium hidroksidin 10 %-li məhlulu (pH-ın korreksiyası üçün), inyeksiya üçün su.

Semavic® Next, 1 mq/doza, dərialtı yeridilmə üçün məhlul

Məhlulun hər mL-də 1,34 mq semaqlutid vardır. Əvvəlcədən doldurulmuş hər bir şpris-qələmdə 3 mL məhlulda 4 mq semaqlutid (hər biri 1 mq olmaqla 4 doza) vardır.

Digər inqrediyentlər bunlardır: dinatrium hidrofosfat dihidrat, propilenqlikol, fenol, xlorid turşusunun 10 %-li məhlulu və ya natrium hidroksidin 10 %-li məhlulu (pH-ın korreksiyası üçün), inyeksiya üçün su.

Semavic® Next, 1,7 mq/doza, dərialtı yeridilmə üçün məhlul

Məhlulun hər mL-də 2,27 mq semaqlutid vardır. Əvvəlcədən doldurulmuş hər bir şpris-qələmdə 3 mL məhlulda 6,8 mq semaqlutid (hər biri 1,7 mq olmaqla 4 doza) vardır.

Digər inqrediyentlər bunlardır: dinatrium hidrofosfat dihidrat, propilenqlikol, fenol, xlorid turşusunun 10 %-li məhlulu və ya natrium hidroksidin 10 %-li məhlulu (pH-ın korreksiyası üçün), inyeksiya üçün su.

Semavic® Next, 2,4 mq/doza, dərialtı yeridilmə üçün məhlul

Məhlulun hər mL-də 3,2 mq semaqlutid vardır. Əvvəlcədən doldurulmuş hər bir şpris-qələmdə 3 mL məhlulda 9,6 mq semaqlutid (hər biri 2,4 mq olmaqla 4 doza) vardır.

Digər inqrediyentlər bunlardır: dinatrium hidrofosfat dihidrat, propilenqlikol, fenol, xlorid turşusunun 10 %-li məhlulu və ya natrium hidroksidin 10 %-li məhlulu (pH-ın korreksiyası üçün), inyeksiya üçün su.

Semavic® Next preparatının tərkibində natrium vardır (2-ci bölməyə baxın).

Semavic® Next preparatının xarici görünüşü və qablaşmanın içindəkilər

Semavic® Next dərialtı yeridilmə üçün məhlul rəngsiz və ya demək olar ki, rəngsiz, şəffaf məhluldur.

3 mL məhlul brombutil kauçukdan hazırlanmış rezin disklərdən və alüminiumdan kombinə edilmiş qapaqlarla bağlanmış, brombutil kauçukdan hazırlanmış rezin plunjerli, neytral şüşədən hazırlanmış I hidrolitik sinifə məxsus rəngsiz şüşə kartricdə.

Kartric 0,25/ 0,5/ 1,0/ 1,7/ 2,4 mq/doza dozalarını yeritməyə imkan verən çoxdəfəlik inyeksiyalar üçün çoxdozalı, birdəfəlik istifadə üçün nəzərdə tutulmuş plastik şpris-qələmə quraşdırılır. Hər bir şpris-qələmin korpusuna polipropilen plyonkadan etiket yapışdırılır.

Çoxdəfəlik inyeksiyalar üçün 1 ədəd əvvəlcədən doldurulmuş, çoxdozalı, birdəfəlik şpris-qələm və içərisində birdəfəlik istifadə üçün 4 ədəd iynə olan 1 ədəd karton qutu içlik vərəqə ilə birlikdə karton qutuya qablaşdırılır.

Dərman vasitəsinin dövlət qeydiyyatı haqqında vəsiqənin sahibi

Rusiya Federasiyası ООО “GEROPHARM”
191119, Sankt-Peterburq şəhəri, Zveniqorodskaya küç., ev 9 Tel.: +7 (812) 703 79 75 (çoxkanallı)
Faks: +7 (812) 703 79 76
Elektron poçt: inform@geropharm.ru

İstehsalçı

Rusiya Federasiyası ООО “GEROPHARM”
1. Moskva vilayəti, Serpuxov şəhər dairəsi, Obolensk qəsəbəsi, Məhəllə A ərazisi, tikili 5
2. Moskva vilayəti, Serpuxov şəhər dairəsi, Obolensk qəsəbəsi, Məhəllə A ərazisi, korpus 1, tikili 5
3. Moskva vilayəti, Serpuxov şəhər dairəsi, Obolensk qəsəbəsi, Məhəllə A ərazisi, korpus 82, tikili 4

İstehlakçıların bütün iradları dərman vasitəsinin dövlət qeydiyyatı haqqında vəsiqənin sahibinin nümayəndəsinə və ya dərman vasitəsinin dövlət qeydiyyatı haqqında vəsiqənin sahibinə göndərilməlidir:

Rusiya Federasiyası ООО “GEROPHARM”
196608, Sankt-Peterburq ş., Puşkin ş., Yaçevski proezd, ev 4, bina 1. Tel.: +7 (812) 703 79 75
Faks: +7 (812) 703 79 76
Elektron poçt: inform@geropharm.ru; farmakonadzor@geropharm.com

Digər informasiya mənbələri

Bu preparat haqqında ətraflı məlumatlar Avrasiya İqtisadi Birliyinin https://eec.eaeunion.org/ internet saytında yerləşdirilmişdir.